شفت كفه عامل إزاي م الشقا؟
شفت جلده والكعوب متشققة؟
شفت ضهره وهوا محني
وشكله عامل حرف إل؟
شفت بقه لما يضحك
كل ضحكة سنان تقل؟
شفت شعره أبيض إزاي م اللي شافه؟
و لما كح دم إزاي الكل خافوا؟
شفته طبطب ع العيال
إزاي وهما بيلعبوا؟
و خاف عليهم قد إيه
م اللف لحسن يتعبوا؟
شفته ف صوان العزا
عمال يدوّر ف الوشوش
على حد لسه يعرفه
على حد لسة مودعوش
شفته ودع كام صديق..
و كام حبيب؟
و كام قريب؟
و دعوته وسط الصلاة
يا رب متسبنيش غريب
خدني أتونس معاهم
كله راحلك إلا أنا
وإن كان لسة ف العمر باقي
طب فاضللي كام سنة؟
آسف....أنا مش قصدي أراجعك
والشكوى دي مش كفر مني
مش قولتلي....إحكي اللي واجعك؟
طلع الكلام كدا غصب عني
طلع الكلام
أهبل...وخام
عيل عبيط
ملهوش لجام
والعمر دايرة
مقفولة صح
أولها
.نلقاه ف الختام
0 comments:
Post a Comment